ရန်ကင်းချောင်ဝယ် လေးပင်-နှစ်ပင် သွပ်မိုးကျောင်းကလေး၌ သီတင်းသုံးတော်မူရာ နွေရာသီ နေ့လယ်ပိုင်းတချိန်က ထိုဆရာတော်ကြီးအား တိပိဋကဓရဆရာတော်က သွားရောက် ဖူးမြော်၍ အာလာပ သလ္လာပစကား ပြောရင်း -
`ဆရာတော်၊ ဒီကျောင်းကလေးပေါ် နေရတာ မပူဘူးလား ဘုရား´ ဟု လျှောက်ထားသည့်အခါ -
ရန်ကင်းဆရာတော်ကြီးက - `မပူအောင် နေရတာပေါ့လေ´ဟု မိန့်တော်မူသည်။
ထိုအခါ တိပိဋကဆရာတော်က `မပူအောင် ဘယ်လိုနေပါသလဲ ဘုရား´ဟု ထပ်မံ လျှောက်ထားရာ -
`ဘုန်းကြီးတော့ အလွန်အေးမြတဲ့ ပဒုမ္မာကြာ ရေကန်ကြီးထဲ ဆင်းနေရသလို မှတ်ထင်လိုက်တာပဲ´ဟု မိန့်တော်မူလေသည်။
ရန်ကင်းဆရာတော်ကြီး၏ စကားမှာ အဓိပ္ပာယ် လေးနက်လှသည်။
ဆရာတော်ကြီးကား အပ္ပိစ္ဆတာဂုဏ်နှင့် ပြည့်စုံသူ သူတော်ကောင်းကြီးတည်း။
ထိုဆရာတော်ကြီးစကား နာကြားလိုက်ရပြီးနောက် တိပိဋကဆရာတော်သည် ထိုအတိုင်း နှလုံးသွင်း နေထိုင်တော်မူခဲ့သည်။ တိ-နိ သံဃာတော်များအားလည်း ရာသီဥတု ပူပြင်းချိန်ဝယ် ရန်ကင်းဆရာတော်ကြီး၏ နည်းအတိုင်း `အလွန်အေးမြတဲ့ ပဒုမ္မာကြာရေကန်ကြီးထဲ ဆင်းနေရသလို မှတ်ထင်နေထိုင်ကြဖို့ရန်´ သြဝါဒ ပေးတော်မူလေသည်။
+++++
ဘဒ္ဒန္တသီလက္ခန္ဓာဘိဝံသ ရေးဖွဲ့ ပူဇော်သည့် မင်းကွန်းဆရာတော်ကြီး သက်တော်ရာပြည့် အထိမ်းအမှတ် (၁၂၇၃-၁၃၇၃)၊ `တိပိဋကဓရအရှင်မြတ်များ၏ ဖခင်၊ ကမ္ဘာကျော် မင်းကွန်းထေရ်ရှင်´ စာအုပ်မှ
No comments:
Post a Comment