သာသနာ တည်တံ့ ပြန့်ပွားရေးအတွက် ဆောင်ရွက်မှုသည် သာသနာပြုခြင်း ဖြစ်၏။ စာသင်တိုက်ဖွင့်၍ စာသင်သားများအား စာပေသင်ကြားခြင်း၊ ရိပ်သာဖွင့်၍ တရားပြခြင်း၊ မိဘမဲ့ကလေးများ, ဆင်းရဲသောကလေးများကို ထောက်ပံ့ ပညာသင်ကြားပေးခြင်း၊ ဘုရား စေတီများ တည်ခြင်းတို့ကို သာသနာပြုခြင်းဟု နားလည်ထားကြလေသည်။
စာသင်တိုက်များ ဖွင့်လှစ်၍ သာသနာပြုမှသာလျှင် ဗုဒ္ဓအဆိုအဆုံးမ သာသနာတော်ကြီး အရှည်တည်နိုင်သည်ဟု ပညာရှိများ ထောက်ပြကြလေသည်။ မှန်ပေသည်၊ စာပေတတ်သိမှသာ အကျင့်တရားကို မှန်ကန်စွာ ကျင့်ကြံနိုင်ပေမည်။ ထို့ကြောင့် စာသင်တိုက်ကြီးငယ်များ အရှည်တည်တန့်အောင် အားပေး ထောက်ပံ့ကြဖို့ လိုအပ်ပါသည်။ ရိပ်သာများ၊ ဘုရားတည်သောကျောင်းများကို ထောက်ပံ့ကြသူတွေက များပါသည်။ ထို့ပြင် ပရဟိတကျောင်းများကိုလည်း အားပေး ထောက်ပံ့သင့်ပေသည်။ ဆင်းရဲသော ကလေးများအား ကျွေးမွေး ပညာပေးနေသော ကျောင်းများ ချိနဲ့နေပါလျှင် ထိုကလေးများသည် အခြားဘာသာကို အားကိုးသွားကြမည် အမှန်ဖြစ်သည်။ ဗုဒ္ဓဘာသာကို စောင့်ရှောက်လိုသူအားလုံး အထူးသတိပြုကြရန် ဖြစ်၏။ ထို့ကြောင့် အမျိုးဘာသာ စောင့်ရှောက်လိုသော သံဃာတော်များသည် တပိုင်တနိုင် ပရဟိတသာသနာပြုလုပ်ငန်းကိုလည်း တွဲဖက်ပြီး လုပ်ကြရမည် ဖြစ်ပါသည်။
တပိုင်တနိုင် ပရဟိတ
စာသင်တိုက်များသည် ကလေးများကို လက်ခံ၍ တပိုင်တနိုင် ပရဟိတသာသနာကိုလည်း တွဲဖက်ပြီး ပြုနိုင်ပေသည်။ ရဟန်းတော်များ၏ ဆွမ်းကျန်ဟင်းကျန်များကို ကျွေးပြီး အတန်းကျောင်းထားပေးခြင်း ဖြစ်သည်။ သံဃာတစ်ရာရှိသော စာသင်တိုက်၌ ကလေးနှစ်ဆယ်လောက်ကို မွေးပြီး ကျောင်းထားပေးနိုင်ပါသည်။ ထိုကလေးများသည် သာသနာ၏ကျေးဇူးကို မေ့ကြမည် မဟုတ်ပါ။ ပဇ္ဇောတာရုံကျောင်းတိုက်၌ ဆင်းရဲသောကလေးများကို လက်ခံကာ အတန်းကျောင်းပို့ပြီး ဆယ်တန်းအထိ ပညာသင်ခွင့် ပေးခဲ့ပါသည်။ ရန်ကုန်မြို့၌ သံဃာနှစ်ရာကျော်ရှိသော ဝိဇ္ဇောတာရုံစာသင်တိုက်မှာလည်း တိုင်းရင်းသားကလေးများကို လက်ခံပြီး ကျောင်းထားပေးလျက် ရှိပါသည်။
ဘုရားတည်ခြင်း
ဘုရားတည်၍ သာသနာပြုခြင်းသည် သာသနာ့အလံတံခွန်ကို စိုက်ထူခြင်း ဖြစ်၏။ မြန်မာပြည်၌ ဘုရားစေတီအသစ်များ တည်မှုကို ပညာရှိဆရာတော်များ အားမပေးချင်ကြပါ။ ဘုရားစေတီများ များစွာ တည်ထား ရှိနေပြီးဖြစ်သောကြောင့် ဖြစ်၏။ ဘုရားတည်လိုက်သည်နှင့် ထိုနေရာကို လိုအပ်သည့် အခြားကိစ္စများ လုပ်ရန် မသင့်တော့ပေ။ လယ်ဝေးမြို့အနီး ရွာတစ်ရွာမှာ စေတီအသစ်ကြီးတစ်ဆူ တည်ခဲ့ရာ နေပြည်တော်လေယာဉ်ကွင်းနှင့် မလွတ်သောကြောင့် ရွှေ့ပြောင်းခဲ့ရပါသည်။ ဗုဒ္ဓဘာသာဝင်တွေ စိတ်ဆင်းရဲကြ၏။ လက်ပန်းတောင်းတောင် လယ်တီသိမ်နှင့် ဘုရားရွှေ့ဖို့ကိစ္စမှာလည်း ပြဿ နာတွေ တက်နေကြ၏။ ထို့ကြောင့် `အိမ်ထောင်မှု ဘုရားတည်၊ ဆေးမင်ရည် စုတ်ထိုး၊ ဤသုံးမျိုးချက်မပိုင်လျှင်၊ နောင်ပြင်ရန် ခက်သည့်အမျိုး´ဟု ပညာရှိတို့ သတိပေး ဆုံးမထားခြင်း ဖြစ်၏။
`နှလုံးသားမှာ ဘုရားတည်´ဆိုသော အဆုံးအမအတိုင်း ဗုဒ္ဓါနုဿ တိဘာဝနာကို စွဲစွဲမြဲမြဲ ပွားများခြင်း၊ သတိပဋ္ဌာန်ဝိပဿ နာကို ကျင့်သုံးခြင်းသည်သာ ဘုရားအလိုကျသည့် ဘုရားတည်ခြင်း ဖြစ်ပါသည်။ စေတီပုထိုးတွေ များလွန်း၍ တင့်တင့်တယ်တယ် မထားနိုင်၊ အရိုအသေမပေးနိုင်ဖြစ်လျှင် ဗုဒ္ဓအဂါရဝ အပြစ်တွေ ဖြစ်ဖို့ များသည်ကိုလည်း အထူးသတိပြု စဉ်းစားသင့်ကြပါသည်။ ဘုရားကျောင်းကန် အသစ်များ တည်ရန် အလွယ်တကူ ခွင့်မပြုသည့် ထိုင်းနိုင်ငံကို မြန်မာနိုင်ငံအနေဖြင့် အတုယူသင့်သည် ထင်ပါ၏။
မေမြို့ဆောင်း
ကံကော်တစ်ထောင်ကျောင်းမှာ အတော် အေးပါသည်။ အိပ်ခန်းမှာ လျှပ်စစ်အပူပေးစက်ကလေးကို ဖွင့်ပြီး ညအိပ်ခဲ့ရသည်။ နေထွက်လာချိန်မှာ နေပူစာထွက်လှုံနေရသည်။ မေမြို့ဆောင်း အတွေ့အကြုံပင် ဖြစ်သည်။ နောင်တော်ကြီး ဦးကေသဝါဘိဝံသသည် မေမြို့အအေးဒဏ်ကို ခြေအိတ်ကိုစွပ်၊ သင်္ကန်းထူထူခြုံပြီး သည်းခံနေပုံ ရပါသည်။ မြို့သူမြို့သားတွေလည်း ဒီအတိုင်း သည်းခံနေကြပုံ ရပါသည်။ အမေရိကန်မှာ အပြင်က အေးသော်လည်း ကျောင်းထဲ အိမ်ထဲမှာ အပူပေးစက်များ အလုံအလောက်ရှိသောကြောင့် အအေးဒဏ်ကို သိပ်မခံရပါ။
မေမြို့အအေးဒဏ်ကို ခံနိုင်ရန် အင်္ဂလိပ်အိမ်များလို အိမ်မှာ ခေါင်းတိုင်နှင့် မီးဖိုများကို ထည့်ပြီး ဆောက်လုပ်သင့်ပါသည်။ မီးဖိုပူလာလျှင် တစ်အိမ်လုံး နွေးနေပါသည်။ ပြူတင်းပေါက်များကိုတော့ လေလုံအောင် လုပ်ထားရမည်။ ထင်းတုံးတစ်တုံးထည့်ပြီး မီးရှို့ထားပါက တစ်အိမ်လုံး နွေးနေပါသည်။ အမေရိကန်တောရွာ တောမြို့ကလေးများမှာ ယနေ့အထိ ဤမီးဖိုများကို အသုံးပြုလျက် ရှိကြပါသည်။ ဖြစ်သလိုနေ ဖြစ်သလို စားတတ်သော အကျင့်သည် ဘဝတိုးတက်မှုကို မဖြစ်စေနိုင်ပါ။ သဘာဝကို အံတုပြီး နေထိုင်စားသောက်တတ်မှသာ လူနေမှုဘဝ အဆင့်အတန်း တိုးတက် မြင့်မားလာနိုင်ပါသည်။
မန္တလေး
ဇန်နဝါရီလ (၁၈)ရက်နေ့ ညနေ မန္တလေးကို ပြန်ဆင်းခဲ့ပါသည်။ မန္တလေးမှ မောင်မျိုးမျိုးနှင့် မသီတာတို့က သူတို့၏ ပါရာဂွန်ဟော်တယ်မှာ တည်းခိုစေပါသည်။ သူတို့လည်း ကံ့ကော်တစ်ထောင် ဆရာတော်၏ ဒကာများ ဖြစ်ကြသည်။ ခြောက်ထပ် ဟော်တယ်အသစ်ကလေး ဖြစ်သည်။ အမေရိကန်မှ ဟော်တယ်အလတ်စား အဆင့်မှီသည်။ မောင်မျိုးမျိုးသည် ဟော်တယ်ကို သူကိုယ်တိုင် ပုံစံဆွဲ၍ ဆောက်လုပ်သည်ဟု ပြောသည်။ ဟော်တယ်လုပ်ငန်း မလုပ်မီမှာ အကြံဉာဏ်ရအောင် ပြည်တွင်းပြည်ပ ဟော်တယ်များ၌ တည်းခိုပြီး လေ့လာခဲ့သည်။
မြန်မာပြည်မှာ နိုင်ငံခြားခရီးသွားဧည့်သည်တွေ အလာများလာသောကြောင့် ဟော်တယ်လုပ်ငန်း လုပ်ရန် သင့်သော အချိန်ပင် ဖြစ်၏။ လူငယ်များ စီးပွားရေးလုပ်ငန်းတွေကို လုပ်ကိုင်ရဲဖို့ လိုပါသည်။ သို့မဟုတ်က နိုင်ငံခြားသားတွေလက်ထဲ ရောက်ကုန်ကြမည်။ ဒီမိုကရေစီသည် တိုင်းရင်းသားတွေအတွက် ဖြစ်မလာဘဲ လုပ်ရဲကိုင်ရဲသော နိုင်ငံခြားသားတွေအတွက် ဖြစ်သွားမည်ကို မျိုးချစ်သူများ သတိပြုသင့်သည်။ မောင်မျိုးမျိုးရဲ့ ဟော်တယ်မှာ နိုင်ငံခြားသား တည်းခိုသူတွေ များသည်။ တစ်နေ့ ဒေါ်လာလေးငါးဆယ်မျှဖြင့် တည်းခိုနိုင်သည်။
မန္တလေးမှာ မဟာမြိုင်ဆရာတော် ဦးသဇ္ဇနနှင့် သွားရောက် တွေ့ဆုံ နှုတ်ဆက်သည်။ အရင်က မန္တလေးရောက်တိုင်း သူ့ကျောင်းမှာ တည်းခိုခဲ့သည်။ မဟာမြိုင်ကျောင်းသည် သံဃာသုံးရာကျော်ရှိသည့် စာသင်တိုက်ကြီးတစ်တိုက် ဖြစ်သည်။ ကျောင်းတိုက်သည် အဆောက်အဦအသစ်များဖြင့် ပြည့်စုံ တိုးတက်နေပါပြီ။
ဆရာတော်သည် အမရပူရ ဂန္ဓာရုံဆရာတော်၏ တပည့်ရင်း ဖြစ်ပါသည်။ ဘော်လတီမိုးမြို့၊ ကေလာသဝိဟာရကျောင်းမှာ တစ်ဝါဆိုဖူးပါသည်။ စာတော်သည်။ တရားဟောကောင်းသည်။ မှတ်သားစရာ တရားစာအုပ်ကလေးများ ရေးသားပြီး ဓမ္မဒါနပြုသည်။ ကြည်ညိုစရာကောင်းသော ပရိယတ္တိသာသနာပြုပုဂ္ဂိုလ်တစ်ပါး ဖြစ်ပါသည်။
ကျောင်းတိုက်ကို ညီဖြစ်သူ ဦးသာသနနှင့် စာချဘုန်းကြီးများက အုပ်ချုပ်သည်။ ဆရာတော်အနေဖြင့် နံနက်တိုင်း သြဝါဒပေးရသော တာဝန်ကိုသာ ယူထားသည်။ ဆရာတော်သည် ဗုဒ္ဓါနုဿ တိဘာဝနာကို အထူး ပွားများပါသည်။ ဗုဒ္ဓဂုဏ်တော်များကို ရွတ်ပွား အာရုံပြုနေတတ်ပါသည်။ ကံ့ကော်တစ်ထောင်ဆရာတော်သည်လည်း ဗုဒ္ဓါနုဿ တိဘာဝနာပွားများသော ဆရာတော် ဖြစ်သည်။ ဘုရားအာရုံဖြင့် နေလျှင် ဝိသမလောဘ နည်းသည်။ ဘုရားဂုဏ်ကို ကြည်ညိုသည့် သဒ္ဓါအား ကောင်းသည်။ ဘုရားဂုဏ် ပွားထုံလျှင် စိတ်အလို ဆန္ဒ ပြည့်ဝသည်ဟု ဆိုသည်။
ဆရာတော်နှစ်ပါးလုံးပင် ဗုဒ္ဓါနုဿ တိဘာဝနာအားကြောင့် သူတို့၏ သာသနာပြုလုပ်ငန်းများ တိုးတက် အောင်မြင်နေပုံ ရပါသည်။ ကံ့ကော်တစ်ထောင်ဆရာတော်တည်ထားသော သာသနာငါးထောင်စေတီတော်ကြီးနှင့်တကွ ကျောင်းတိုက်ကြီးမှာ ဘုရားဖူးများဖြင့် စည်ကားနေပေသည်။ မဟာမြိုင်ဆရာတော်မှာလည်း မဟာမြိုင်စာသင်တိုက်ကြီး၌ ကိုယ်ကျန်းမာ စိတ်ချမ်းသာ အောင်မြင်စွာ သာသနာပြုနေရပါသည်။
ဗုဒ္ဓါနုဿ တိပွားကျိုး
`ဗုဒ္ဓါနုဿ တိံ ဘာဝေထ၊ ဘာဝနာနမနုတ္တရံ
ဧတံ ဘာဝနံ ဘာဝယိတွာန၊ ပူရယိဿ တိ မာနသံ´
မြန်မာ
`အမြတ်ဆုံး ဘာဝနာတရားဖြစ်သော ဗုဒ္ဓါနုဿ တိ ပွားများကြပါလေ။
ဤဘာဝနာတရားကို ပွားများခြင်းကြောင့် စိတ်လိုအင်ဆန္ဒ ပြည့်ဝနိုင်၏။´
+++++
ဖောင်တော်ဦးဘကကျောင်းကြီး
မဟာမြိုင်ဆရာတော်ဦးသဇ္ဇနကို နှုတ်ဆက်ပြီးနောက် ဖောင်တော်ဦးဘကအထက်တန်းကျောင်းတိုက်ကြီးကို လေ့လာရန် သွားခဲ့ပါသည်။ ဖောင်တော်ဦးဆရာတော် ဦးနာယကသည် အမေရိကန် နယူးယောက်ကို ကြွစဉ်က မိမိကျောင်းမှာ တည်းခိုခဲ့ပါသည်။ ပရဟိတပညာရေးကို ထိရောက်စွာ အားပေးလုပ်ဆောင်နေသော ဆရာတော်တစ်ပါး ဖြစ်ပါသည်။ ပရဟိတသာသနာပြုလုပ်ငန်း အားပေးသော မိမိနှင့် စိတ်ချင်း တူကြသည်။ ထို့ကြောင့်လည်း မန္တလေးမြို့ကို ရောက်ခိုက်မှာ သူ့ကျောင်းသို့ သွားရောက် လေ့လာ အားပေးခြင်း ဖြစ်ပါသည်။
မန္တလေးမြောက်ပြင် လူစည်ကားသောအရပ်မှာ ကျောင်းတိုက် တည်ရှိသည်။ ကျောင်းဝိုင်းအနံ ကျဉ်းသည်၊ အလျားရှည်သည်။ လေးထပ်တိုက်၊ သုံးထပ်တိုက်၊ တစ်ထပ်တိုက် အဆောက်အဦများ ပြည့်နေပါသည်။ ကျောင်းသားဦးရေ ခြောက်ထောင်ကို လက်ခံပြီး တက္ကသိုလ်ဝင်တန်းအထိ ပညာသင်ပေးနေသည်။ ထို့ပြင် ကားပြင်လုပ်ငန်း၊ ကွန်ပျူတာသင်တန်း၊ သစ်သားကြမ်းခင်းလုပ်ငန်း၊ အပ်ချုပ်စက်သင်တန်း စသည့် အသက်မွေးဝမ်းကျောင်းပညာများကိုလည်း တွဲဖက် သင်ပေးသည်။
ဤကျောင်းပညာရေး တိုးတက်ရန် နိုင်ငံခြားလူမှုရေးအဖွဲ့အစည်းတွေက အများဆုံး အကူအညီပေးကြသည် ဆို၏။ ပရိယတ္တိသာသနာ ထွန်းကားသည့် မန္တလေးမြို့ကြီးမှာ လောကီပညာများ ပေးပြီး သာသနာပြုသည့် ဘကပရဟိတကျောင်းများ ရှိဖို့လည်း အထူး လိုအပ်လှပေသည်။ မြို့ပေါ်မှ ဆင်းရဲသားတို့၏ သားသမီးများကို အထက်တန်းပညာ သင်ယူနိုင်ရန် သံဃာတော်များအနေဖြင့် ကူညီပေးမှသာလျှင် မိမိဘာသာကို အားကိုး မြတ်နိုးလေးစားစိတ်တွေ သူတို့မှာ ဖြစ်လာကြပါလိမ့်မည်။ သို့မဟုတ်က အခြားဘာသာများအပေါ်မှာ အားကိုးသွားကြပါလိမ့်မည်။ ဤသည်မှာ တရားနှင့်အညီ မိမိဘာသာကို ကာကွယ်စောင့်ရှောက်ခြင်း ဖြစ်ပါသည်။
အကြံပေးစကား
ဆရာတော်ဦးနာယကသည် မိမိအား ကျောင်းအဆောက်အဦများကို လိုက်လံ ပြသသည်။ လေးထပ်ကျောင်းဆောင်ကြီး၏ တတိယထပ်မှာ နယ်မှ ဘကဘုန်းတော်ကြီးများအား ခေါင်းဆောင်မှုသင်တန်း ပေးနေသဖြင့် မိမိအား ရောက်တုန်းရောက်ခိုက် သြဝါဒစကား အနည်းငယ် ပြောပေးရန် တောင်းဆိုရာ မိမိက သြဝါဒ မဟုတ်ဘဲ အကြံဉာဏ်စကား ပြောမည်ဟု ဆိုရသည်။
ဘက်စုံသာသနာပြုခြင်း
သင်တန်းသားများအား ဘက်စုံသာသနာပြုခြင်းအကြောင်းကို မိနစ်နှစ်ဆယ်ခန့် ဆွေးနွေး ပြောပြပါသည်။ ဘာသာတိုင်း ကိုယ့်နည်းကိုယ့်ဟန်များဖြင့် ဘက်စုံသာသနာပြုနေကြသည်။
(၁) တရားဟော၍ သာသနာပြုခြင်း၊
(၂) စာသင်တိုက်များ တည်ထောင်၍ သာသနာပြုခြင်း၊
(၃) တရားရိပ်သာများ ဖွင့်လှစ်၍ သာသနာပြုခြင်း၊
(၄) ဘုရားတည် ကျောင်းဆောက်၍ သာသနာပြုခြင်း၊
(၅) ပရဟိတကျောင်းများ ဖွင့်၍ သာသနာပြုခြင်းတို့သည် ဗုဒ္ဓဘာသာ ဘက်စုံသာသနာပြုခြင်းများ ဖြစ်ပါသည်။
ပရဟိတသာသနာပြုမှုသည် ဆင်းရဲသောကလေးများ၏ ပညာရေးကို မြှင့်တင် အားပေးသည့်အတွက် လက်တွေ့ကျသည့် သာသနာပြုနည်း ဖြစ်ပါသည်။ ဤပရဟိတသာသနာပြုမှုကို အဓိကထားကာ တိုးတက်အောင် ဆောင်ရွက်သင့်ပါသည်။
ဤနေရာ၌ ဘာသာခြားတချို့၏ ဘက်စုံသာသနာပြုပုံကို ဗုဒ္ဓဘာသာဝင်များ လေ့လာ သိရှိနိုင်ရန် တင်ပြလိုပါသည်။ ဘာသာခြားတို့သည် သူတို့၏ ဘုရားဆိုသည်ကို ကြောက်ရွံ့ ယုံကြည်လာစေရန် တရားဟောခြင်း၊ စာသင်ကျောင်းများ ဖွင့်လှစ်၍ သာသနာပြုခြင်း၊ ဘာသာမတူသူ အမျိုးသမီးများနှင့် အိမ်ထောင်ပြု၍ ဘာသာပြောင်းစေခြင်း၊ လိုအပ်လာလျှင် အကြမ်းဖက်၍ သာသနာပြုခြင်းဆိုသည့် ဘက်စုံသာသနာပြုနည်းများ အသုံးပြုကြသည်။ လက်တွေ့ကျသည့် သာသနာပြုနည်းဖြစ်၍ သူတို့၏ ဘာသာဝင်တွေ ကမ္ဘာမှာ တနေ့တခြား တိုးပွားလျက် ရှိနေပေသည်။
ရဟန်းတော်များသည် မိမိတို့ဘာသာကို မှန်ကန်စွာ ကာကွယ် စောင့်ရှောက်ဖို့ တာဝန်အရှိဆုံး ပုဂ္ဂိုလ်များ ဖြစ်ကြသည်။ တာဝန်ရှိသော ပုဂ္ဂိုလ်များ ဖြစ်ကြသောကြောင့် အရည်အချင်းပြည့်ဝသည့် ခေါင်းဆောင်များ ဖြစ်ကြရပါမည်။ လောကုတ်+လောကီ ပညာနှစ်ရပ်ကို အဆင့်မီအောင် တတ်သိကြရပါမည်။ ကမ္ဘာ့ဗဟုသုတလည်း တီးမိခေါက်မိ ရှိရပါမည်။ ထိုသို့ တီးခေါက်မိနိုင်ရန်လည်း ဗဟုသုတဖြစ်ဖွယ် စာပေဆောင်းပါးများကို လေ့လာ ဖတ်ရှုကြရပါမည်။ ဆိုလိုသည်မှာ မိမိတို့ ဗုဒ္ဓဘာသာဝင်များ၏ ဘဝတိုးတက်မှုသည် ဗဟုသုတပြည့်စုံသော ဗုဒ္ဓဘာသာရဟန်းတော်များအပေါ်မှာ များစွာ မူတည်ပါသည်။ ဖောင်တော်ဦးဘကပရဟိတကျောင်းအနေဖြင့် ဘကကျောင်းထိုင်ရဟန်းတော်များအား အသိပညာ ဗဟုသုတပေး သင်တန်းများ ဖွင့်လှစ်ခြင်း၊ ကလေးများအား လောကီပညာများကို သင်ပေးနေခြင်းသည် နည်းလမ်းမှန်ကန်စွာ အမျိုး,ဘာသာ,သာသနာတော် ကာကွယ်စောင့်ရှောက်ခြင်း ဖြစ်ပါသည်ဟု အကြံပေး ပြောဆိုခဲ့ပါသည်။
ရန်ကုန်အပြန်ခရီး
ဇန်နဝါရီလ ၂၀-ရက်နေ့ နံနက်၌ ရန်ကုန်ကို ဂိုးလ်ဒင်းလေယာဉ်ဖြင့် ပြန်ခဲ့ပါသည်။ ဟော်တယ်မှ ကားဖြင့် လေယာဉ်ကွင်းကို ပို့ပေးသည်။ လေယာဉ်ကွင်းသို့ နှစ်နာရီခန့် ကားမောင်းရမည် ဖြစ်၍ နံနက်လေးနာရီ ဟော်တယ်မှ ထွက်ခဲ့ရသည်။ လေယာဉ်ပေါ်မှာ နံနက်စာ ဝယ်စားရသည်။ မန္တလေးဆေးရုံအုပ်ကြီး၏ ဇနီးက မိမိတို့ သံဃာနှစ်ပါးကို ဆွမ်းဒကာခံပါသည်။ ဆွမ်းဒကာ မပေါ်လျှင်လည်း သံဃာများအား လေယာဉ်က လှူသည်ဟု ပြောပါသည်။
လေယာဉ်ပေါ်မှာ မန္တလေးမှ ဘီစကွတ်မုန့်အလုပ်ရုံပိုင်ရှင် ဒကာမသည် မိမိကို နယူးယောက်မှ ဘုန်းကြီးမှန်း သိသောအခါ မိတ်ဆက်၍ သူ့သမီးအကြောင်း ပြောပြပါသည်။ သူ့သမီးကလေး နယူးယောက်မှာ ကျောင်းတက်နေကြောင်း၊ ကျောင်းပိတ်သဖြင့် မြန်မာပြည်ကို မနက်ဖြန် ပြန်ရောက်မည်ဖြစ်၍ ရန်ကုန်သို့ သမီးအကြိုသွားခြင်းဖြစ်ကြောင်း ပြောပါသည်။ မိမိအား ဆရာတော် နယူးယောက်မှာ သီတင်းသုံးနေရတာ အဆင်ပြေပါသလား၊ ကိုယ့်ပြည်လောက်တော့ ကောင်းမည် မထင်ပါဘုရား ဟု မေးလျှောက်ပါသည်။ မိမိက ... ပျော်လို့ နေတာမဟုတ်ပါဘူး၊ သာသနာတော်အတွက် ပျော်ရာမှာ မနေဘဲ တော်ရာမှာ နေရတာပါ ဟု ပြန်ပြောလိုက်ပါသည်။
မိမိသည် အမေရိကန်ကို ၁၉၈၂-ခုနှစ်ကတည်းက ရောက်ရှိခဲ့ပါသည်။ တရားရိပ်သာကျောင်းသုံးကျောင်းကို ဦးစီးပြီး တည်ထောင်ခဲ့ပါသည်။ နယူးယောက်မှာ လောကချမ်းသာဘုရားကျောင်း၊ နယူးဂျာစီမှာ မဟာစည်သတိပဋ္ဌာန်ရိပ်သာနှင့် လောကချမ်းသာစေတီတော်၊ ဘော်စတွန်မြို့မှာ မဟာသတိပဋ္ဌာန်ကျောင်းတို့ ဖြစ်ပါသည်။ အထူးအားဖြင့် မြန်မာပြည်ဖွား ဗုဒ္ဓဘာသာဝင်များသည် ဗုဒ္ဓယဉ်ကျေးမှုကို ပြည်ပ၌ ကျင့်သုံးနိုင်ကြရန် ရည်ရွယ်ပြီး ဤရိပ်သာကျောင်းများကို တည်ထောင်ထားခြင်း ဖြစ်ပါသည်။ ပြည်တွင်းမှာပဲ နေနေ၊ ပြည်ပမှာပဲ နေနေ ရဟန်းတပါးအနေဖြင့် သာသနာ့တာဝန်ကို တတ်နိုင်သမျှ ထမ်းဆောင်နေဖို့သာ အရေးကြီးပါသည်။
ရန်ကုန်ပရိယတ္တိသာသနာ့တက္ကသိုလ်
အရှင်ဉာဏိဿ ရ(မော်လူး)သည် မြန်မာပြည်၌ မိမိ၏ခရီးစဉ် အားလုံးမှာ လိုက်ပါ ကူညီဆောင်ရွက်ပေးခဲ့ပါသည်။ သူသည် ရန်ကုန်ပရိယတ္တိတက္ကသိုလ်မှာ ဘီအေဓမ္မာစရိယဘွဲ့ ရခဲ့ပါသည်။ ချင်းတောင်မှာ သုံးနှစ်ကြာ အောင်မြင်စွာ သာသနာပြုနိုင်ခဲ့သည်။ သူ၏ ချင်းပြည်နယ် သာသနာပြု အတွေ့အကြုံ စာအုပ်ကလေးသည် စိတ်ဝင်စားစရာ စာအုပ်ကလေး ဖြစ်ပါသည်။
ပရိယတ္တိတက္ကသိုလ်၌ ဟောပြောပွဲ
ဦးဉာဏိဿ ရသည် ပရိယတ္တိတက္ကသိုလ်၌ ဆရာများနှင့် တပည့်ဟောင်းများ တွေ့ဆုံ သြဝါဒခံယူပွဲရှိသဖြင့် မိမိအား တက်ရောက်ပြီး သြဝါဒစကား ချီးမြှင့်စေလိုကြောင်း လျှောက်ထားပါသည်။ မိမိကလည်း ဖြစ်နိုင်ကြောင်း ပြောလိုက်ပါသည်။ ယင်းတက္ကသိုလ်၏ အဓိပတိဆရာတော် ဒေါက်တာအရှင်အာဒိစ္စဝံသနှင့် တိုင်ပင်၍ မိမိအား အခမ်းအနား၌ ဦးစွာ စကားပြောစေခဲ့ပါသည်။
မိမိအနေဖြင့် ထေရဝါဒသံဃာ့တက္ကသိုလ်မှာ စကားပြောခဲ့ဖူးသော်လည်း ပရိယတ္တိတက္ကသိုလ်မှာ စကားမပြောခဲ့ဖူးပါ။ ဤတက္ကသိုလ်၌ မိမိ၏ ဆရာဖြစ်သူ ဆရာကြီးဦးအောင်ခိုင်သည် စာသင်ပေးခဲ့ပါသည်။ ဘုန်းကြီး ဦးအဘယာလင်္ကာရလည်း ဝိနယဌာနမှူး လုပ်ခဲ့ပါသည်။ ဘုန်းကြီး ဦးအဘယာလင်္ကာရမှာ ယခု အမေရိကန် ဘော်စတွန်မြို့ မဟာသတိပဋ္ဌာန်ကျောင်းဆရာတော်အဖြစ် သီတင်းသုံးနေပါသည်။
တက္ကသိုလ်ဘွဲ့နှင်းသဘင်ကျောင်းဆောင်မှာ စကားပြောရသည်။ ကမ္ဘာအေးဘုရားဝိုင်းကြီးသည် သစ်ပင်ပန်းပင်များဖြင့် စိမ်းလန်းစိုပြေ သာယာနေပါသည်။ သာသနာ့အဆောက်အဦများမှာလည်း ခန့်ညားတင့်တယ်ပါသည်။ တိပိဋကဓရမင်းကွန်းဆရာတော်ဘုရားကြီး စတင် ပျိုးထောင်ပေးခဲ့သော ဤတက္ကသိုလ်ကြီး အစဉ်တိုးတက်ပြီး ပညာပြည့်ဝ နှလုံးလှသည့် သံဃာတော်များကို မွေးထုတ်ပေးနိုင်ပါစေဟု ဆုတောင်းမိပါသည်။
အမြင်သာသနာ အသင်သာသနာ
အမြင်သာသနာ အသင်သာသနာအကြောင်းကို နာရီဝက်ခန့် ရှင်းပြပါသည်။ အမြင်သာသနာဆိုတာ သာသနာ့အဆောက်အဦများနှင့် ရဟန်းတော်များ ကြည်ညိုဖွယ် နေထိုင်ပုံကို ဆိုလိုပါသည်။ ရဟန်းတော်များသည် သင်္ကန်းရုံ၍ မြို့တွင်းရွာတွင်း သွားလာခြင်း၊ ယဉ်ကျေးသိမ်မွေ့စွာ စားသောက်သုံးဆောင်ခြင်း စသည့် သေခိယကျင့်ဝတ်သိက္ခာပုဒ်များကို လေးစားလိုက်နာ နေထိုင်လျှင် ဒကာ ဒကာမများ၏ ကြည်ညိုမှုကို ခံယူရပါလိမ့်မည်။
ကျောင်းအဆောက်အဦများလည်း သပ်ယပ် ခန့်ညားမှု ရှိရပါမည်။ ဂါမဝါသီရဟန်းများဖြစ်၍ ဖြစ်ကတတ်ဆန်း ဆောက်လုပ်ပြီး မနေသင့်ပါ။ ကလေးငယ်များသည် ကျောင်းလှလှပပကို မြင်မှ ကျောင်းသို့ သွားချင်ကြပါသည်။ ခရစ်ယာန်ဘုရားရှိခိုးကျောင်းများ၊ ဗလီများနှင့် နှိုင်းယှဉ်ပြီး ကြည့်တတ်ကြပါသည်။ သူတို့အဖို့ အမြင်သာသနာသည် ပိုအရေးကြီးပါသည်။ ပြီးမှ တရားစာသင်မှု အသင်သာသနာကို ပြုရပါမည်။
လှော်ရင်းနစ်
သာသနာပြုရာ၌ စနစ်မှန်မှသာ တိုးတက်မည်၊ အောင်မြင်မည်။ သို့မဟုတ်က လှော်ရင်းနစ်သလို ဖြစ်နေလိမ့်မည်။ စာသင်တိုက်များသည် သာသနာပြုကျောင်းတိုက်များ ဖြစ်ကြသည်။ သို့သော် ယနေ့စာသင်တိုက် အများအပြားသည် စာသင်ရဟန်းတော်များ နည်းပါးလာနေပေသည်။ ဓမ္မာစရိယစာမေးပွဲများ အောင်မြင်သော်လည်း စာမတတ်ကြ၊ တရားကိုလည်း ကောင်းကောင်း မဟောတတ်ကြ ဖြစ်နေကြလေသည်။ ဤသို့ဖြစ်ရသည်မှာ ပညာသင်မှုစနစ် မမှန်သောကြောင့် ဖြစ်သည်။ လှော်ရင်း နစ်နေခြင်း ဖြစ်သည်။
ပညာသင်စနစ်
ရဟန်းတော်များ၏ လက်ရှိ ပညာသင်စနစ်ကို စိစစ်ကြည့်လျှင် စာမေးပွဲအောင်မှုက အဓိကဖြစ်နေ၏။ သို့ဖြစ်၍ စာမေးပွဲအောင်မြင်ဖို့အတွက် နည်းမျိုးစုံဖြင့် ကြိုးစားကြလေတော့၏။ အိန္ဒိယမှာ ဒေါက်တာဘွဲ့သွားယူကြသည့် အရှင်အများလည်း ဤနည်းအတိုင်းပင် ဖြစ်နေကြပေသည်။ ဒေါက်တာဘွဲ့ကြီးများကို ပိုက်ပြီး ပြန်လာကြသော်လည်း ပါဠိစာပေ၌လည်း တိုးတက်မလာပေ။ အင်္ဂလိပ်စာအရည်အချင်းက ပိုဆိုးပါသေးသည်။ နာမည်ကြီးဖို့အတွက် ပညာသင်၍ အရည်အချင်းရှိဖို့ ပညာသင်ခြင်း ဖြစ်ပုံ မရပေ။ အရည်အချင်းမပြည့်ဝသည့် ထိုရဟန်းတော်များသည် မိမိနိုင်ငံတိုးတက်အောင် မည်သို့ခေါင်းဆောင်မှုကို ပေးနိုင်ကြပါမည်နည်း။
တရားရိပ်သာများ
မြန်မာနိုင်ငံ၌ တရားရိပ်သာ အတော်များများ ရှိပါသည်။ အောင်မြင်သည့် ရိပ်သာများ၌ ကျောင်းဆောင်များကို မြေလွတ်မထားဘဲ မှိုလိုပေါက်နေအောင် ဆောက်လုပ်ထားကြသည်။ ရိပ်သာနှင့်မတူတော့ဘဲ ရိပ်မသာများ ဖြစ်နေပါသည်။ ဘုန်းကံကြီးသော ပုဂ္ဂိုလ်လက်ထက် အဆောက်အဦများကို ဘုန်းကံနည်းသော နောက်ဘုန်းကြီးများလက်ထက်မှာ ထိန်းသိမ်း စောင့်ရှောက်ရန် မလွယ်ကူ ဖြစ်လာတတ်ပါသည်။ ထို့ကြောင့် ရိပ်သာနှင့်တူအောင် လိုသလောက်ကိုသာ လက်ခံ ဆောက်လုပ်သင့်ပေသည်။
မိမိအလှူရှင်တို့အား ထောက်ပံ့ရန် လိုအပ်သည့် စာသင်တိုက်များ၊ ပရဟိတကျောင်းများကို ထောက်ပံ့ကြရန် အကြံပေးသင့်ပေသည်။ သာသနာတော် ဖွံ့ဖြိုး တိုးတက်ရေးကို ဝိုင်းပြီး ထမ်းဆောင်ခြင်း ဖြစ်ပါသည်။
ဓမ္မကထိက သာသနာပြုများ
နှစ်ဆယ့်တစ်ရာစု၌ ဓမ္မကထိကပုဂ္ဂိုလ် အတော်များများ ပေါ်ထွက်လာသည်ကတော့ ဝမ်းသာစရာပါပင်။ အသံကောင်း အပြောကောင်း အဟောကောင်းသော ဓမ္မကထိကများ၏ ကြော်ငြာရုပ်ပုံများကို ရုပ်ရှင်မင်းသားများလို လူစည်ကားသောနေရာတို့၌ ချိတ်ဆွဲပြီး တရားပွဲဖိတ်ထားကြလေသည်။ တရားနာပရိသတ်ကလည်း စည်ကားလှသည်။ ဓမ္မပူဇာအလှူငွေ သိန်းပေါင်းများစွာကိုလည်း လှူဒါန်းကြသည်။ ထို့ကြောင့် ဓမ္မကထိကကျောင်းကန်များ ချမ်းသာ ပြည့်စုံကြလေသည်။ ဓမ္မကထိကများအနေဖြင့်လည်း စာသင်တိုက်များကို တတ်နိုင်သမျှ အားပေး ထောက်ပံ့လျှင် သာသနာအရှည်တည်ရေးအတွက် အကျိုးရှိလှပါလိမ့်မည်။
တရားဟောကြားခြင်း
တရားဟောမှုသည် တရားအလှူပေးခြင်း ဖြစ်၏။ ဓမ္မဒါနကုသိုလ်ဟု ခေါ်၏။ မြတ်စွာဘုရားရှင်သည် သတ္တဝါများအား တရားဟောကြား၍ ဘဝဆင်းရဲမှ ကယ်တင်တော်မူခဲ့၏။ ဗုဒ္ဓဘာသာ စည်ပင် ပြန့်ပွားရေးသည် ထိရောက်စွာ ဟောပြောနိုင်သော ဓမ္မကထိကရဟန်းတော်များအပေါ်မှာ များစွာ မူတည်ပါ၏။ မိုးကုတ်ဆရာတော်ဘုရားကြီးသည် အများနားလည်အောင် ဟောပြောနိုင်သဖြင့် ဝိပဿ နာတရားကို လိုက်စားသူများ ပေါများလာခဲ့၏။ သပိတ်အိုင်ဆရာတော်လည်း အသံကောင်း အဟောကောင်း နိုင်ငံကျော်ဓမ္မကထိကတစ်ပါး ဖြစ်၏။
ဟောပြောသော တရားများမှာ နိဗ္ဗာန်ရောက်ကြောင်းတရားများ ဖြစ်ကြ၏။ ယင်းတရားများကို အဓိကဟောကြားရမည်ဖြစ်သော်လည်း လောကီကြီးပွားရေး တရားများကိုလည်း ဟောကြားပေးသင့်ပါ၏။ `အူမတောင့်မှ သီလစောင့်နိုင်မည်´ဆိုသည့် စကားအတိုင်း ပစ္စည်းဥစ္စာ အသင့်အတန် ပြည့်စုံမှသာ တရားဓမ္မကို ကောင်းစွာ အားထုတ်နိုင်မည် ဖြစ်၏။ ဗုဒ္ဓကိုယ်တော်တိုင် ဘဝအောင်မြင်ရေးလမ်းညွှန်တရားများ ဟောကြားခဲ့သည်ကို တွေ့ရပါသည်။ ထို့ကြောင့် ဓမ္မကထိကပုဂ္ဂိုလ်တို့သည် ဘဝကြီးပွားတိုးတက်ရေးတရားများကို မိမိဘာသာဝင်များအား အထူးဟောကြားပေးရပါမည်။ ဘာသာရေးပဋိပက္ခဖြစ်စေမည့် တရားများကို ဟောခြင်းသည် ဗုဒ္ဓအလိုကျဖြစ်မည် မထင်ပေ။ ဗုဒ္ဓဘာသာကို ကာကွယ်စောင့်ရှောက်လိုလျှင် မိမိဘာသာဝင်တွေကို ဘာသာခြားများနှင့်ယှဉ်ပြိုင်ပြီး စီးပွားရေးလုပ်တတ်အောင် လုပ်ရဲအောင် လုပ်နိုင်အောင် ဟောပြောခြင်း ကူညီပေးခြင်းကိုသာ ပြုလုပ်အပ်ပါသည်။
No comments:
Post a Comment