နှစ်သစ်ကို ကြိုဆိုဖို့ ဟန်ရေးတပြပြ အစီအစဉ်တွေ ချနေကြသူများ၊ Happy New Year ဟူ၍ နှုတ်ဆက်သံများ ကျယ်လောင်စွာ ကြားနေရသည်။
အသစ်အသစ်ကို အမြတ်တနိုး ကြိုဆိုကြတာဟာ လောကသဘာဝပါ။
အဟောင်းရဲ့ အဆုံးဟာ အသစ်၊
အသစ်ရဲ့ အဆုံးဟာ အဟောင်း။
အဟောင်း အသစ်၊ အသစ် အဟောင်းဟာ ဆက်စပ်နေတာပါ။
သူတို့နှစ်ခု တစ်ခုခုကို ဖယ်ထုတ်ပစ်လို့ မရပါ။
အသစ်ကို ကြိုဆိုရင်း အဟောင်းကို ပြန်လည် သုံးသပ်ကြရပါတယ်။
`ရှေ့တစ်ခေါ် မျှော်ကြည့်၊ နောက်တစ်လံ ပြန်ကြည့်´ ဆိုတဲ့ စကားပုံဟာ ရှေ့နောက်မြော်မြင် သမ္ပဇဉ်ဖြင့် ဉာဏ်ယှဉ်ကာ သုံးသပ်တတ်ဖို့ လိုကြောင်း ဆိုလိုပါတယ်။
အဟောင်းထဲက အကောင်းတွေ၊ အဟောင်းထဲက အနှစ်တွေ ယူရသလို၊
အဟောင်းထဲက အရှူံးတွေ အမုန်းတွေကိုလည်း ချေဖျက်ကာ သင်ခန်းစာ ယူတတ်ကြဖို့ လိုပါတယ်။
နှစ်သစ် ကမ္ဘာသစ် ဘ၀သစ် အသစ်အသစ်ဆီကို လျှောက်လှမ်းကြမည့် သူတိုင်းဟာ အဟောင်းထဲက သင်ခန်းစာမယူ မဆင်မခြင် မပြုမပြင်ဘဲ လျှောက်လှမ်းကြမည်ဆိုလျှင် တစ်စပ်တည်း တွဲစပ်နေတဲ့ နှစ်ဟောင်းက မကောင်းတဲ့ အမူအကျင့် အဖြစ်သနစ်တွေ တစ်စပ်တည်း တစ်ထပ်တည်း ပြန်ပါလာပါက ဒီပုတ်ထဲက ဒီပဲတွေပဲ ဖြစ်နေဦးမှာပါ။
Happy New Year ဖြစ်ဖို့ လိုအပ်သလို Happy Life ဖြစ်ဖို့လည်း လိုအပ်ပါတယ်။
ပျော်ရွှင် သာယာလှပတဲ့ ဘ၀ပိုင်ရှင်တွေဖြစ်ဖို့အတွက် စည်းစနစ်ရှိရပါမယ်။ မျက်စိဖွင့် နားစွင့်၍ ကြိုးစားကြရပါမယ်။
ရည်မှန်းချက် ရှိရပါမယ်။ မျှော်မှန်းထားသလို ရည်မှန်းချက်တွေ ပြည့်စုံလာပါက ပျော်ရွှင်ချမ်းမြေ့စရာ ဘ၀ကို ရမှာ ဖြစ်ပါတယ်။
ဘ၀တိုးတက်ရေးအတွက် ကံ ဉာဏ် ၀ီရိယ အပြည့်အ၀ အသုံးပြု ကြိုးစားအားထုတ်ရင် အားထုတ်သလောက် ထိုက်သင့်တဲ့ အကျိုး ခံစားကြရမှာ မလွဲပါဘူး။
ဒီဘ၀ ပြည့်စုံတဲ့ ဘ၀ပိုင်ရှင်တွေဟာ ပြုသင့်တဲ့ လူမှုရေးအကျိုးပြုလုပ်ငန်း(ကုသိုလ်ရေး)၊ ကိုယ်ကျင့်တရားကောင်းမွန်ရေး(သီလအကျင့်)တွေ ပြုဖို့ မေ့လျော့ကာ သံသရာမှာ တ၀ဲလည်လည် ကြာရှည် ကျင်လည်နေစေတတ်တဲ့ တရားတွေနဲ့သာ ပျော်မွေ့ယစ်မူးနေကြမယ်ဆိုရင်လည်း ပျော်ရွှင်ဖွယ် ဘ၀တွေကနေ လျောကျ၊ အန္တရာယ်မျိုးစုံ ဒုက္ခတွေအဖုံဖုံလည်း တွေ့ကြုံ၊ ချွတ်ခြုံနုံချာတဲ့ ဘ၀တွေထဲ ရောက်သွားနိုင်ပါတယ်။
နှစ်သစ်မှာ ကျက်သရေ မင်္ဂလာအဖြာဖြာနှင့် ပြည့်စုံဖို့ လူတိုင်း လိုလားတောင့်တကြစမြဲပါ။
ထိုလိုလား တောင့်တချက်တွေ ပြည့်စုံဖို့ `ကုသိုလ်´နှင့် `ပညာ´ပါမှ ဖြစ်တယ်ဆိုတာ ဗုဒ္ဓမတ္တညူ အဋ္ဌကထာဆရာက `သိရီတိ ဗုဒ္ဓိပုညာနံ အဓိဝစနံ´လို့ ညွှန်ကြား ဖွင့်ဆိုပြပါတယ်။
ဒီစကားအရ ပညာတန်ဆောင် အလင်းရောင် မပါဘဲ ဘ၀အမှောင်ထဲ လျှောက်တိုင်း လျှောက်တိုင်း အန္တရာယ်တွေဆီသို့ ဦးတည် ဦးတည် လျှောက်လှမ်းနေသလို ဖြစ်ပါတယ်။
ကိုယ်ပိုင် အသိဉာဏ်ပညာက စပြီး လောကဘက် ဓမ္မဘက် သင်ယူလေ့လာစရာ ပညာရပ်တွေ များပြားလှပါတယ်။
ထိုထိုပညာရပ်တွေ လေ့လာသင်ကြားထားမယ်ဆိုရင် ကောင်းဆိုးအမှန် ဝေဖန်ခွဲခြား သိနိုင်စွမ်းအားရှိလို့ ပညာတရားဟာ လောကရဲ့ ကျက်သရေဆောင် မင်္ဂလာဖြစ်တယ်လို့ အဋ္ဌကထာဆရာက ညွှန်းဆိုထားပါတယ်။
ပညာသာမက ပုညခေါ်တဲ့ ကုသိုလ်တရားရှိဖို့လည်း လိုအပ်လှပါတယ်။
ပစ္စည်းဥစ္စတွေ ပြည့်စုံနေလို့ ကိုယ်တစ်ဦးတည်း စားသုံး သုံးဖြုန်းနေလို့ မဖြစ်ပါ။ အကျိုးရှိရာ အကျိုးရှိကြောင်း ကောင်းမှုတွေ၊ ပရဟိတလုပ်ငန်း စတာတွေ တစ်ပိုင်တစ်နိုင် ခွဲဝေမျှတ စွန့်ကြဲပေးကမ်းရပါတယ်။
ဒါနကုသိုလ်ဟာ လောကရဲ့ အလှတစ်ပါး၊ ကျက်သရေမင်္ဂလာတိုးတက်ကြောင်း တရားပါပဲ။
ပုညကုသိုလ်လို့ ပြဆိုတဲ့ နေရာမှာ ဒါနသာမက သီလကုသိုလ်လည်း ပါဝင်ပါတယ်။
သီလဆိုတဲ့ ကိုယ်ကျင့်တရားနဲ့ ပြည့်စုံရင် အဲဒီပုဂ္ဂိုလ်အတွက် ကျက်သရေမင်္ဂလာ တိုးတက်ဖြာဝေနေပါတယ်။
သီလဆိုတဲ့နေရာမှာလည်း ယနေ့ လောကမှာ လူတော်လူကောင်းတွေ ကျင့်သုံးကြတဲ့ ငါးပါးသီလ (၀ါရိတ္တသီလ=မပြုမလုပ်ရဆိုတဲ့ တားမြစ်တဲ့ သီလ) ခေါ် ကိုယ်ကျင့်သီလနဲ့ ပြည့်စုံဖို့ လိုပါတယ်။
ဒါ့အပြင် အမျိုးကောင်းသား အမျိုးကောင်းသမီတွေ ကျင့်သုံးကြတဲ့ စာရိတ္တသီလ (တာဝန်ဝတ္တရားများ ကျေပွန် ကျင့်သုံးခြင်း သီလ) ခေါ် မိမိရဲ့ တာဝန်ဝတ္တရားများ ကျေပွန် တာဝန်ယူ ကျင့်သုံးရသည့် ကိုယ်ကျင့်သီလနဲ့ ပြည့်စုံဖို့လည်း လိုပါတယ်။
ဥပမာ - မိဘနဲ့ သားသမီး ဆက်ဆံရေးမှာ သားသမီးအပေါ် ပြုလုပ်ပေးရမည့် မိဘ၀တ္တရားဖြစ်တဲ့ `မကောင်းမြစ်တာ၊ ကောင်းရာညွှန်လတ်၊ အတတ်သင်စေ၊ ပေးဝေနှီးရင်း၊ ထိမ်းမြားချင်းလျှင်၊ ၀တ်ငါးအင်၊ ဖခင်မယ်တို့တာ´ဆိုတဲ့ အဆုံးအမတွေ ရှိပါလျက် ထိုဝတ္တရားတွေ ဆောင်ရွက်မပေးလျှင် တာဝန်မကျေ ၀တ္တရားပျက်ကွက်၍ သီလပျက်တယ်လို့ ပြောရပါတယ်။
အရက်သောက်ပြီး ဆူပူကြိမ်းမောင်းလို့ လူသိများတဲ့ သုရာမေရယသိက္ခာပုဒ်(၀ါရိတ္တသီလ)ပျက်တာသာ သိပြီး၊ မိဘ၀တ္တရား မကျေပွန် (စာရိတ္တသီလ)ပျက်တာကို သီလပျက်တယ်လို့ သိသူ နည်းပါးတယ်လို့ ထင်ပါတယ်။
မိဘတွေက သားသမီးအပေါ် ပြုရမယ့် ၀တ္တရားရှိသလို သားသမီးတွေကလည်း မိဘတွေအပေါ် `ကျွေးမွေးမပျက်၊ ဆောင်ရွက်စီမံ၊ မွေခံထိုက်စေ၊ လှူမျှဝေ၍၊ စောင့်လေမျိုးနွယ်၊ ၀တ်ငါးသွယ်၊ ကျင့်ဖွယ်သားတို့တာ´ ဆိုတဲ့ ၀တ္တရားတွေကို မသိကျိုးကျွန်ပြုကာ သားသမီးကျင့်ဝတ်ပျက်ကွက်တာဟာ (စာရိတ္တသီလ) သီလပျက်တာပါပဲ။
မိဘနှင့်သားသမီး၊ ဆရာနှင့်တပည့်၊ လင်နှင့်မယား၊ ဆွေမျိုးညာတိချင်း၊ မိတ်ဆွေချင်း အချင်းချင်း အပြန်ပြန် အလှန်လှန် ပြုရမယ့် ၀တ္တရားတွေကို ကျေပွန်စွာ မပြုလုပ်သမျှ တာဝန်မဲ့မှု ၀တ္တရားပျက်ကွက်မှုဟာ စာရိတ္တသီလတွေ ပျက်နေတာပါပဲ။
ငါးပါးသီလ(၀ါရိတ္တသီလ) ပျက်တာဟာ မြင်သာပေမယ့်၊ (စာရိတ္တသီလ) ကျင့်ဝတ်သီလပျက်တာကိုတော့ သိသူ နည်းပါးသလို ဖြစ်နေပါတယ်။
အိမ်တွင်းရေး သာယာငြိမ်းချမ်းမှု၊
ရပ်ကွက် တိုးတက်သာယာမှု၊
နိုင်ငံ ဖွံ့ဖြိုးတိုးတက်မှုဟာ (၀ါရိတ္တသီလ) ငါးပါးသီလ လုံခြုံရုံမျှမက (စာရိတ္တသီလ) ကျင့်ဝတ်သီလပါ ပြည့်စုံမှ အပြည့်အ၀ သာယာ တိုးတက် ဖွံ့ဖြိုးပါတယ်။
ဒီ ၀ါရိတ္တသီလ စာရိတ္တသီလတွေ လုံခြုံ ပြည့်စုံနေရင် သီလကုသိုလ်တွေ ဖြစ်နေပါတယ်။
သီလကုသိုလ်တွေ ဖြစ်နေရင် ကျက်သရေမင်္ဂလာတွေ တိုးတက် ဖြစ်ထွန်းနေတာပါပဲ။
ကိုယ်ချင်းစာစိတ်ထား သနားငဲ့ညှာ၊ မေတ္တာဘာဝနာ စတဲ့ ဗြဟ္မစိုရ်တရားများနဲ့ အခြား ဘာဝနာတရားတွေဟာလည်း အဆင့်မြင့်တဲ့ ကုသိုလ်တရားတွေ ဖြစ်ပါတယ်။
ဒီ ကုသိုလ်တရားတွေ ဖြစ်နေရင် ကျက်သရေမင်္ဂလာတွေဟာ တက်နေပမာ တိုးတက်ဖြစ်ထွန်းနေပါတယ်။
ဗုဒ္ဓမတ္တညူ အဋ္ဌကထာဆရာ ညွှန်ပြသည့် -
ဗုဒ္ဓိပုည ဤနှစ်ဝကို
စေ့ငုသေချာ ပြုကျင့်ပါက
နှစ်သစ်မင်္ဂလာ ဖြာဖြာကျက်သရေ
လင်းလက်ဝေမည် တက်နေပမာပုံသို့တည်း။
ဆိုသည့်အတိုင်း -
(၁) နှစ်သစ်နှစ်ဆန်း၊ စိတ်ရွှင်လန်း၊ ဆင်မြန်းကုသိုလ်တွေ။
(၂) ကုသိုလ်ပြုကာ၊ ကြိုဆိုကာ၊ လွန်စွာကောင်းမြတ်ပေ။
(၃) ကုသိုလ်ပညာ၊ ပြုလုပ်ပါ၊ ကျက်သရေမင်္ဂလာ တိုးကြောင်းပေ။
(၄) သီလနှစ်ဖြာ၊ ကျင့်သုံးပါ၊ ကျက်သရေမင်္ဂလာ တိုးကြောင်းပေ။
(၅) ကျက်သရေးတိုးက၊ ဒို့ဘ၀၊ မုချ သာယာလှမည်ပေ။
ဟု ယုံကြည် စိတ်စွဲ ... နှစ်ဟောင်းနှစ်သစ် ဘယ်နှစ်မှာပဲဖြစ်ဖြစ် ... ဘ၀ရှင်သန် ကောင်းမွန်ရေးဖြစ်တဲ့ စီးပွား ကျန်းမာ ဂုဏ်သိန်(သိရ်) အဖြာဖြာ တိုးတက် ပြည့်စုံအောင် ကြိုးစားအားထုတ်နိုင်ကြပါစေ။
နှစ်သစ်မှာ ပျော်ရွှင် ချမ်းမြေ့ကြပါစေ။
Happy New Year!
အရှင်စက္ကိန္ဒ
လောကချမ်းသာဘုရားကျောင်း
နယူးယောက်မြို့။
No comments:
Post a Comment